Brian Fenton le Corn Shomhairle Mhig Uidhir tar éis do pheileadóirí Átha Cliath Craobh na hÉireann a bhuachan i 2023
Le Jamie Ó Tuama
D’fhógair an laoch peile lár páirce de chuid Átha Cliath, Brian Fenton, go bhfuil sé tar éis éirí as painéal idirchontae Átha Cliath maidin inniu.
D’imir Fenton, 31, le peileadóirí Átha Cliath don chéad uair thiar sa bhliain 2015 agus ó shin i leith tá seacht gcinn de chraobhacha uile-Éireann agus deich gcinn de chraobhacha Laighean buaite aige. Bhí sé ar thús cadhnaíochta d’Áth Cliath le linn an ama sin agus tugadh aitheantas ar leith dó nuair a ainmníodh é mar Imreoir na Bliana sna blianta 2018 agus 2020. Sé cinn ar fad de Ghradaim All-Star a bhuaigh Fenton le linn a thréimhse sa gheansaí gorm agus dúghorm. Bhuaigh sé ceithre cinn de Shraitheanna Allianz freisin.
Tagann an cinneadh seo ó Fenton sna sála ar chinneadh James McCarthy éirí as an painéal le gairid.