An Bonn Óir de Fhondúireacht Sheosaimh Mhic Dhonncha Bainte Amach ag CLG Bhaile an Dóirín - Club Sheosaimh Mhic Dhonncha
Bhronn Uachtarán Chumann Lúthchleas Gael, Seán Ó hÓráin, agus Aodhán Mc Cormaic, Stiúrthóir na Gaeilge i Roinn na Gaeltachta, 34 bonn ar chlubanna CLG mar aitheantas ar a gcuid oibre agus an Ghaeilge á cur chun cinn acu ina gcuid clubanna. Ba i bPáirc an Chrócaigh a eagraíodh an ócáid bhronnta oíche Shathairn seo caite, 15 Nollaig.
Ba é seo an dara hócáid bhronnta de chuid Fhondúireacht Sheosaimh Mhic Dhonncha, scéim tacaíochta de chuid Chumann Lúthchleas Gael agus Ghlór na nGael atá dírithe ar chlubanna CLG ar mian leo an Ghaeilge a chur chun cinn. Bronnadh boinn óir ar 3 chlub i mbliana – CLG Bhaile an Doirín, CLG Ghaoth Dobhair agus CLG na Sáirséalaigh, Cill Laobháin - agus ba iad siúd an chéad trí chlub le boinn óir a bhaint amach i stair ghairid na fondúireachta. Bronnadh boinn airgid ar 11 club agus bronnadh boinn chré-umha ar 20 club.
Is in ómós do Sheosamh ‘Joe’ Mac Donncha (1953-2016) a ainmníodh an Fhondúireacht nua seo. Fear le háireamh a bhí i Joe a bhain go leor amach dó féin agus do phobal na tíre seo i gcoitinne le linn a shaoil. D’éirigh leis an post is airde a bhaint amach i gCumann Lúthchleas Gael. Mar iománaí, thóg sé Corn Mhic Cárthaigh leis siar go Gaillimh agus bhí sé ina phríomhfheidhmeannach, agus ina chathaoirleach, ar chuid de mhóreagraíochtaí na tíre seo, Foras na Gaeilge ina measc.
Bhí bean chéile agus clann Sheosaimh Mhic Dhonncha i láthair ag an ócáid bhronnta agus cuireadh fáilte ar leith rompu.
‘Tá Cumann Lúthchleas Gael tiomanta go hiomlán don scéim seo agus tá muid ag súil go mór le fás agus forbairt na Fonndúireachta sna blianta amach romhainn. Is ag gabháil ó neart go neart atá sí. Ba mhaith linn aitheantas ar leith a thabhairt dár gcuid páirtnéirí, Glór na nGael, agus buíochas a ghabháil leo as ucht a gcuid oibre i riar na scéime. Ba mhaith liom comhghairdeas a dhéanamh leis na clubanna uilig ar bronnadh boinn orthu. Tá éacht thar na bearta déanta acu uilig.’
Seán Ó hÓráin, Uachtarán Chumann Lúthchleas Gael
Thíos tá liosta de na clubanna uilig ar bronnadh duaiseanna orthu. Tá tuilleadh eolais maidir le Fondúireacht Sheosaimh Mhic Dhonncha ar fáil ag www.glornangael.ie/clg
Bonn Óir:
Cumann Peile na Sáirséalaigh, Cill Laobháin, Co. Mhuineacháin
CLG Ghaoth Dobhair, Co. Dhún na nGall
CLG Bhaile an Doirín, Co. na Gaillimhe
Bonn Airgid
An Ríocht CLG, Co. an Dúin
CLG Eoghan Rua, Cill Chua, Co. an Dúin
CLG Bhun Abhainn Dála, Camógaíocht, Co. Aontroma
CLG Raonaithe na Croise, Crois Mhic Lionnáin, Co. Ard Mhacha
CLG An Caisleán Glas agus Sperrin Óg, An Ómaigh, Co. Thír Eoghain
Cumann Peile na mBan, Maigh Cuilinn, Co. na Gaillimhe
Cú Chulainn CLG, An Mullach Bán, Co. Ard Mhacha
CLG Bhearna, Co. na Gaillimhe
CLG Eoin Bosco, Iúr Cinn Trá, Co. an Dúin
CLG Thuar Mhic Éadaigh, Co. Mhaigh Eo
CLG Na Fianna, Glasnaíon, Áth Cliath
Bonn Cré-Umha
CLCG Phailís na Gréine, Co. Luimnigh
CLG Áit Thí Chathail, Cill Chaoil, Co. an Dúin
CLG an tSráidbhaile, Co. Phort Láirge
Gormacha Bhaile Mhic Colla CLG, Co. Ard Mhacha
CLG Mhainistir na Corann, Co. Chorcaí
CLG Thigh Chon Connacht, Dún Phádraig, Co. an Dúin
CLG Na Piarsaigh Óga, Ard Mhacha
CLG na Fuachonbhála, Co. Dhoire
CLG Charn Domhnaigh, Co. Dhún na nGall
CLG Naomh Pádraig, Droim Dhá Thiar, Co. Liatroma
Na Tráchtálaithe, Ráth Chúil, Co. Bhaile Átha Cliath
Cill Mochuda na Crócaigh, Co. Bhaile Átha Cliath
Gaeil na Gaillimhe, Gaillimh
GLG Thaite Riabhach, An Ómaigh, Co. Thír Eoghain
CLG Dhoire Lochan, Dún Geanainn, Co. Thír Eoghain
CLG Bhaile an Phuill, Co. Chill Chainnigh
CLG Naomh Pádraig, Uisce Chaoin, Co.Dhún na nGall
CLG Eadarnaí, Co. Fhear Manach
CLG Naomh Maolmhaodhóg, Éadan na dTorc, Co. Thír Eoghain
CLG Naomh Raghnach, Beannchar, Co. Uíbh Fhailí
