Nuair a thiteann an crú ar an tairne
Le Pádhraic Ó Ciardha tuairisc.ie
Craolfar athimirt chluiche ceannais idirmheánach na Gaillimhe idir foirne Chonamara, An Spidéal agus Micheál Breathnach, ar leathanach Youtube Spórt TG4.
Tá sé fógartha ag TG4 go bhfuil siad chun beochraoladh a dhéanamh ar athimirt chluiche ceannais idirmheánach na Gaillimhe idir An Spidéal agus Micheál Breathnach.
Is ar leathanach Youtube Spórt TG4 a bheidh an cluiche le feiceáil ó 1.00pm tráthnóna Dé Domhnaigh.
Chríochnaigh an chéad chluiche idir comharsana Chois Fharraige ar comhscór i Staid an Phiarsaigh an deireadh seachtaine seo caite, nuair a d’aimsigh Micheál Breathnach dhá chúilín sna sé nóiméad deireanach chun a chinntiú go mbeadh lá eile ag an bPaorach.
Bhí slua mór i láthair i Staid an Phiarsaigh don chéad chluiche agus beidh súil le slua níos mó fós Dé Domhnaigh agus cluiche ceannais chraobh shinsir na Gaillimhe idir Cora Finne agus an Creagán/Maigh Locha á imirt i ndiaidh an chluiche idirmheánaigh.
Déanfar craoladh, freisin, ar chluiche ceannais Chraobh shinsir peile Bhaile Átha Cliath tráthnóna Dé Luain nuair a chasfaidh Crócaigh Chill Mochuda agus Naomh Jude ar a chéile ag 5.00pm.
